Gen 25 | TVK | STEP |

Genesis 25

Hi Pol ni Hitxatien te Xeih Tei Del Aesak

Senesis 25:19-34; 26:1-6

19 Ngan ak be tumulen usil Aesak, nat Ebraham. 20 Aesak, huram nan tehe hanutap lu (40) melele xa teteli tetel Rebekah xa be atuli na Betuel ^{▼▼25:40 Rebekah tehe atuli na Betuel xa tehe nat Nahor xa tehe tua na Ebraham.} (ngan Aramea xa de Mesopotemia) e tunahin Leban. 21 Aesak xal Rebekah ludi vituei e xi misakras vahur tuvava tova nalu. Misak ni, Aesak misis ba mi Iahova ve rin na atou nan e xi milong sisen nan, ma pol ni Rebekah meas. 22 E vangen, meah lu ludi en, e di lunggum en. Misak ni, ninexalu milong pangas xi holu. Ve rin ak, Rebekah di minemi bit, “?Veneh ma di nalong pangas nou mak?” Ma ba misis mi Hi ve koute teni.

23 E Iahova biteni mini bit,

“Horamue lu xa ludi e vangom.
Ngan xa itutou mei ihe eilep mak mu ili ngan xa itiamu,
e ngan xa itiamu mei ihe moletin te polien na ngan xa itutou.
Ngan xalu ak xa uling xalu laliti tetasil ni xalu
e mei lalihe vatit moletin lu te vanut moletin lu xa eilep xa lihe elu mi xil.”
24 Melele xa melengien pipin tengan valeh tuvava, Rebekah mileh meah lu xa lube malohos. 25 Ngan xa diamu, ahben pili e meul xol tenben xil vus. Misak ni luling hisen be 'Esao' xa koute teni be 'ahben holu'. 26 Ngan xa dutou, melele xa latepesi, xi di tetal xat asele tuneli. Misak ni luling hisen be 'Siekob' xa koute teni be 'moletin xa di dal xat asele'. ^{▼▼25:26 His Siekob, koute tei mun teni be 'moletin te luvosen'.} E Aesak, huram nan tehe hanutap tol (60) e melele xa atou nan teleh meah xalu ak.

27 Melele xa horamue xalu ak lumeul mei lube tellep, Esao mei be moletin te kokoe en xa ien bei mak mu vate xol suse. E Siekob be hanmerou tei xa di dat tim. 28 Tamealu Aesak, eheien nan di e Esao vengan xa ien bei pupu ni tengan ti va vuran xil xa Esao di basi. E ninealu Rebekah, eheien nan di e Siekob.

29 Vatei, Siekob de tim e di mikuk ni sup tei te bin xa pipili. Di, Esao nggo xol suse bemei, e mae nggat pupu ni. 30 Misak ni xi biteni mi Siekob bit, “!Mae nggat nou tova tang! !Sa ti sup tepili xai mei nama ni!” Ve rin ak, laling hisen tei mun be 'Edom' xa koute teni be 'pili'.

31 Siekob bit rilomun ni mini bit, “Inou nakila nisa ti minuk xosxa xouk umaen nou nihur rat voninom te muimol.” ^{▼▼25:31 E sexien na mol-Siu xil, muimol xa be horamue te famle tei ihur von he tamen itel holesok nan xil holu melele xa imat. E mi horamue sav xil e famle, xil lileh ti rut holesok tang ihe nae mu lihe moletin te polien tang na ngan xa be muimol.}

32 Ma Esao bit, “Bos tang, huri. ?Vengan xa xosxa mae iat vin nou nimat, voninok xa nabe muimol itutou ni nou itep?”

33 E Siekob bit rilomun ni mini bit, “Itiamu, e pe met Hi, upol ni hitxatien tengan xouk upos ni voninom te muimol minou.” Misak ni, Esao maen Siekob tengan ixal rati ni sup nen tak. 34 Ma Siekob misa sup e beret mini. Xi ngganien e mu oei vuteili, di, mea ba. Nggo rin ngan tak iaxa Esao minem mele ni voninen xati te muimol.